دونن لرين ايزي واردير

چوخ دان سوسان بال ديليوين

دئييلمه ميش سؤزو واردير

بلكه هله بير امه يه

اومدوغوموز مين ديله يه

يئديييمز دوز چؤره يه

اؤرتولمه ميش گؤزو واردير

شيطانلارا داش آتماغين

اورك دن درد بوشاتماغين

بابك اوچون ياشاتماغين

منلييي يوخ ، بيزي واردير ...

بو گونلرده قوجا یولداشیملا بیر ماراقلی دئییشمه ییمیز اولدو کی بو مقام دا اونو حورمتلی اوخوجولاریمیزین حضورونا چاتدیریرام ...

بابک)

خیالیم دیرماشیر داغلارا – داشا
باشیمدان اؤتوشور فصیللر – ایللر
گوللرین عطریندن دویمارام هئچ آن
اسنده مغان دان تبریزه یئللر


قوجا)
دورنا تک خیالین،اوچور گویلره
گزیر ؛ اولکه لری؛ گزیر ائللری
آغ بولود ایچینده چیمیب - یویونور
وطنله دویونور، اوره ک تئللری

بابک)
بیر قوجا شاعیره وورغون اولموشام
کؤنلومو اودلاییر شعرلر – غزل لر
دئییرم یانیمدا آنجاق کی سن اول
منه نه لازیم دی باشقا گؤزللر ؟
 
قوجا)
تب قالادی، ایتی طبع ئین، سینه مه
تم – تاراقلی، سؤز آز یازدیم ازه ل لر
یول اوزاقدی، عومروم خزان، قیناما!!
گول دیبینده خوش گورونه ر خزه ل لر!؟

بابک)
ایسته رم قاریشام آرازا آخام
او پاک تورپاغینی اؤپمه یه گلم
گوللر آراسیندا ، منده اوشاق تک
اویناییب ، هم قاچیب ، اوخویام ، گولم

قوجا)
عینآلینین سن، آچ،! بندین- بره سین
قوش داغلار سئلینه، آرازتک آخیم
مین یارپیز، قوخولو گولون- تره سین
اوینارکن،دوشؤوه، قوتاز تک تاخیم

بابک)
شاعیر خیالی دا بیر قوش کیمی دیر
هر یانا ایسته سه اوچار ، باش چکر
بیر قاریش تورپاق دا ، بیر دار قفسده
قیزیل دان ، گوموش دن سارای لار تیکر ...

قوجا)
او اینجه سسینده، وار باشقا هوس
بزه ک لی اوخوشون! بیل داوود سسی
نه! سرحد تانیماز، نه ده! دار قفس
قوشلار نغمه سیدی، داغ شلاله سی

بابک)
دینله بو شعریمی آی قوجا دوستوم  
ائشیت بو بابکین غم لی ناله سین
دوروب یولا دوشوب یئتیش هاییما
شعرلریندن یوخ ائت ، هجران هاله سین

قوجا)
دویدوقجا شعرینی، گوزلریم قارداش!
مکتبون اوستونه، سپدی ژاله لر
سنین گوروشونه! ایاق، اولدو باش
هجرانی، گوتوره ر، بو وصاله لر

بابک)
بوتون محبتیم ، بوتون حس لریم
بو مکتوبلا چاتیر بیر دوست الینه
تکجه شاعیر دئییل ، پیر دیر ، قوجادیر
وورولموشام اونون شیرین دیلینه ...

قوجا)
محببت ین، "بابک" منی اوجالدیر
خوش سوزلرین فرصت سالدی الیمه
قارداشینی! تک آیرلیق "قوجا"لدیر
قوی!کور اولسون،خورباخانلار!دیلیمه

سپیلیب شهرین هر کوچه سینه

گئدیرم

لاپ اوزاق خاطیره لره

گلجک بیزیم دیر ،

گلرم یئنه !...

بیر آددیم یاخینام

بیر آددیم اوزاق

اؤزومده بیلمیرم

هاردایام ، کیمم ؟

آدیمی یازماغی

باجارمیرام هئچ

مین خسته یه درمان

دلی حکیمم ...

دولانیب گزیرم ، خیاوانلاری

اؤزوم اوتانیرام آددیملاریمدان

دونن آتین چاپان غیرتلی بابام

بو گونده تاریخلر دایاق دیر بیزه

بو شهر قوجادیر

قوجا بابامدان

بینالار باغری دا

قورخوب ، چاتداییب

گؤرمه دیم ، دئییرلر اولو بابامیز

مزاردان قالخیب دیر ،

یامان آغلاییب !...

نه لر وار ، نه لر وار ، نه لر بورادا ؟

مین کیتاب یازساندا ،

هله قورتارماز

آنجاق کی غیرتلی ایگید اوغوللار

هئچ زامان تورپاغین

اونودوب ، دانماز .

 اوخشاییب یاغیشین دامجی لارینا

قاریشیب چاپلارین عصیان چاغینا

گئدیرم

بیر داها دنیزه  دؤنوب

دوم دورو سئللرله

گلم یانینا !...

(بابک قوجا اوغلو)

نه ائديم بير داها يوخسان يانيمدا
خاطيره قاطاري آپاردي سني ...
دالينجا ها قاچديم چاتا بيلمه ديم
کولک لر يانيندان قوپارتدي مني ...

ايندي کي گئديبسن نه دئييم آخي ؟
بير دوداق گولوشه حسرت قالميشام
گئجه لر ـ گوندوزلر غريب دير منه
تک سنين رويانا شيرين دالميشام ...

بير آنليق گؤزومه توخون نه اولار
قوي هله ياشاسين دلي اوره ييم
باهاردير ، باهاردير ، خزان دئييل کي
هله آچيلماميش سولا چیچه ییم ...

(شعر : بابک قوجازاده)

مين آرزيم وار ، مين بير ديلك

اوشومه رم اسسه كولك

دوست دوستونو گؤره گرك

گلين دوستلار گؤروشك بيز

بير من دئييم بيرينده سيز ...

حسرتيمين كؤكو درين

اوره ييمين ديبي سرين

آيريليغا سينه گرين

گلين دوستلار گؤروشك بيز

بير من دئييم بيرينده سيز ...

كئچيب قيشي چاتديق يازا

فصيل تازا ، گونللر تازا

گلين سؤزو وئرك سازا

گلين دوستلار گؤروشك بيز

بير من دئييم بيرينده سيز ...

داغ دؤشونده سفره آچاق

چايين عطرين چؤله ساچاق

كدرلردن اولاق قاچاق

گلين دوستلار گؤروشك بيز

بير من دئييم بيرينده سيز ...

يولونوزو گؤزلر گؤزوم

آدينيزي اوخشار سؤزوم

آيريليغا نئجه دؤزوم ؟

گلين دوستلار گؤروشك بيز

بير من دئييم بيرينده سيز ...

شعر : بابک قوجازاده

----------------------------------------------------------------------------------------------------------------

حورمتلی "قوجا" دوستوم بو شعره جاواب یازماغلا داها دوغر.س. شعرده منله دئییشیبلر کی همین دئییشمه نی

یالقیز آغاج  وبلاگیندا گوروب اوخویا بیلرسینیز . منده اونا جان ساغلیغی هابئله کونول خوشلوغو آرزیلاییرام

یوخلاییب دؤزمــــــه دی بیر داهـــــا ائللر

ناله لــــر های اولدو ،  قاریشدی سئلـــــــه

شاهلارین تـــــــاختینی سیندیرماق اوچون

اراده کمــــــــــــــرین باغــــــــلادی بئله

سعادت یولـــــوندا جـــــــــــانیندا کئچن

بو ائللر بالاسیــــن قـــــــــوربان دا وئردی

ووروشدو ـ  ساواشــــــــدی گئجه لر بویو

آیدین سحرلری آخیر کـــــــــــی گؤردو

نــــه شاها باش اییب ، نه نؤکــــــرلــــــره

بـــــــــو خالقین تاریخده باشـــی اوجادیر

دونیا نه لر گؤرسه یادیندا ساخــــــــــــلار

تاریخـــی کؤهنه دیر، دونیا قوجا دیـــــــر

گوللری سولمـــــــــاز دیر یاشـــــار ابدی

لاله ســـی رنگ آلیب شهید قانینــــــــدان

نه تورپـــــــــاق یاشادیب نه آخـان سولار

آلیب دی گوجونـــو انسان جانینــــــــدان

" هــــر ائلین اوبانین آغ ساققالــــــــی وار

شادلیقــــــــــدا ـ کـــدرده هامییا یولداش

سعادت دنیزین آختارمـــــــــــــاق اوچون

اونونلا یولداش اول ، جوشوب ، یولا داش

آخیب دره لـــــــردن ســـــــوزول باغلارا

مین سوسوز آغاجا پاییندان پـــــــــای وئر

بیر یازیق اینســـــــــانین مظلوملـــــــوغونا

داغلار تک دایانیب هایینا هــــــــای وئر "

 بونلاری دوشونوب بویــــــــوک خالقیمیز

دوروبدا ، جوشدودا ، کـــــاخلار داغیتدی

ظالیملر باشینـــــا نفرتلــــــــــه بیــــــردن

گؤیلــــــــردن آلوولار ، اودلار یاغیرتدی

نه قورخـــوب ، نه دوروب ، نه ده سویودو

مسلسل لــــــــــــــر سس سیز اوتاندیلاردا

ـ کاخلاری اوچورتمـاق بس دئییل! ـ دئییب

شیطانلیق ائوینی یانــــــــــــــــدیردیلار دا

مین فیتنه ـ فسادین کؤکون قـــــــورودوب

قورویوب ســــــــــــاخلادی بو ائلی ، اللر

نه قــــــــدر چالیشیب دانیشـــــــــدیلاردا

هئچ نه ائدنمــــــــــــه دی کینه لی دیللر !

سونــــرادا گؤیلردن یاغیب بمبــــــــــالار

دشمـــــــــــن غضبی نی سپـــــدی بو ائله

آنجاق بو ائللرین قورخمـــــــــــاز بالاسی

اونون آرزولارین ســــــــــــــوووردو یئله

اوواختدان بیر چوخلـــــــو فصییلر کئچیب

ساعاتلار دورمــــــــــادان گلیب اؤتوشدو

ظلمتــــــــه دؤزمه یـــــــــــن آتا ـ آنادان

ایگیـــــــــــــد اوغوللارلا قیزلار یئتیشدی

داها نه بیر غـــــم وار نه ده بیر کـــــــــدر

بو ائل دایانمادان  فصیللـــــــــــــــر سورر

آزادلیق یولوندا ووروشان ائللــــــــــــــــر

البتـــــــــــه آخیردا آزادلیــــــق گؤرر ...

 ( بابک قوجازاده ـ تبریز )

ایللرله یاشایار تاریخده  ایزی

مین پایین ایچینده بیر پاییم آنا

هرنغمه ن حیرته دالدیرار بیزی

دیلیندن دوشمه ین ، لای لاییم آنا

سن منیم تانریدان آلما پاییمسان

شاختالی قیش لاردا باهار ـ یاییمسان

قارانلیق گئجه ده پارلاق آییمسان

دیلیندن دوشمه ین ، لای لاییم آنا

بؤیوسم   اؤتوشسه یاشیم نه قدر

چکمرم کؤنلومه غم غصه کدر

قویمارام لایلایین لال اولسون هدر

دیلیندن دوشمه ین ، لای لاییم آنا

سسینه سس وئریب یاخین اوزاقدان

تئلینی سوزه رم تاختا داراقدان

قوی اؤپوم بیر داها او آل یاناقدان

دیلیندن دوشمه ین ، لای لاییم آنا

گلیرم اوستونه گلیرم آنا

گلیرم پای آلام اؤتن چاغیندان

مزارین اوستونه گلیرم آنا

کوچه میزده سنسیز یامان داریخیر

پالچیق دووارلاردان دونن لر یاغیر

ایندی آنلامیشام منه دونیادا

سنسیسزلییین مین بیر دردیمدن آغیر

سماوار سؤنوبدور یاندیرانی یوخ

اوره ییم گؤینه ییر ، دؤزه بیلمیرم

سنسیز اوتاقلاری سنسیز حیطی

درد الیندن دوروب گزه بیلمیرم

آلمالاردا داها سنسیز قیزارمیر

یاسمن لر حزین حزین آغلاییر

بیلیرم ، بو باغچا داریخیب سنه

گیلاس آغاجیمیز اورک داغلاییر

چادیران صاندیق دا یئتیم قالیب دیر

مؤهورون ـ تسبئهین گؤز یاشی تؤکور

گلیرم بیر داها سنی گؤرمه یه

سنسیزلیک بئلیمی نه یامان بوکور ...

گلیرم بیر دسته گول له ـ چیچک له

قبیر داشین اؤپم یاناغین کیمی

نه اولار ، نه اولار ، نه اولار آنا

منیمله دین ـ دانیش قوناغین کیمی

ماشین لار گلمه سه قبریستانلیغا

قونقا باشیندا کی آتلار چاپاجاق

دومانلار توتسادا گؤروش یئرینی

خیاللار آختاریب سنی تاپاجاق

چوخداندیر یاتمیسان سس سیز ـ سمیر سیز

گلیرم اوستونه گلیرم آنا

گلیرم پای آلام اؤتن چاغیندان

مزارین اوستونه گلیرم آنا ...

بابک قوجازاده - تبریز

ایچینده بوتون حسرتلریم

عصیانلی آنلاریملا بیرگه ...

گؤزلرینه یازیلان سئوگی شعرلرینه بنزر

قانیم دا جوشاجاق !...

بیر مکتوب یازاجاغام سنه

خاطیره دفتریمین

اپریمیش واراقلارینا یاشیت

سؤزجوکلریمله ...

بیر مکتوب یازاجاغام سنه

گنجلیک ایللرینین کارت پوستاللاری تک

سطیرلریمده سه اؤپه جه یم سنی ...

من !...

مکتوبلاریمی اوخومادان

بیر یانا توللاساندا

یازدیغیم شعرلری

آنلاماساندا

سن منه هئچ زامان

مکتوب یازماساندا

بیر مکتوب یازاجاغام یئنه

سنین خاطیره نه بو گئجه ...

(شعر : بابک قوجا اوغلو)

ترجمه فارسی :

اگر سنگهایی که در آغوشت هست

تمام هم شود

مشت مشت زیتون ها را

در جیب هایت بریز

سحر نزدیک است

بر روی دشمنان

زیتون تف خواهیم کرد ...

(شعر : بابک قوجازاده)