كوسوب گئتسن ، گلجكسن

سن هر نه يي بيله جكسن

منسيز سنده اؤله جكسن

من دونيادا اولماياندا ...

مني باشدان آتانمازسان

بير گون راحات ياتانمازسان

سونرا گليب چاتانمازسان

من دونيادا اولماياندا ...

من نه دئديم آنانمادين

بو سئوگي يه اينانمادين

بلكه بوردا دايانمادين

من دونيادا اولماياندا ...

دونن گلديك بيز اوز اوزه

دئمك اوندا گلديك گؤزه

دونيا ماهني قوشار بيزه

من دونيادا اولماياندا ...

بلكه داها گلنمه ديم

گؤز ياشيني سيلنمه ديم

دردلريني بيلنمه ديم

من دونيادا اولماياندا ...

قوي آختارسين گؤزوم سني

يوخولاردا گزيم سني

اوره يمه يازيم سني

من دونيادا اولماياندا ...

شيرين چاغلار اؤتوشدو تئز

يانيب سونرا اولموشوق كؤز

دئمه :  نه آز ياشاديق بيز !

من دونيادا اولماياندا ...

منسيز موتلو اولسون يولون

ايستي اللر توتسون قولون

عهدينيزه صاديق اولون

من دونيادا اولماياندا ...

(بابک قوجا اوغلو)

هر گؤروش سيزين چون

يئني بير ميتينگ

تلسين ...

تريبون سيزي گؤزله يير

آغليمي باشيمدان آپاردينيزدا

قارپيز قارپيز

اكين ائله دينيز قولتوقلاريمي

شاشيردينيز

تام رؤيالارين شيرينلييينه ،

حياتين اوزونو آغ ائتدينيز

يئتدي قات گؤيلره

قالديردينيز مني

قانادسيز اوچاماغا مني زورلادينيز .

مني هر اؤتوشن دويغولارا

آلداتدينيز يالانچي لار ...

اوتانماز ماكئت لر ...

قولچاقلار ...

تبريزين نيفرتلي هارايلارينا

رقص ائتدينيز لاپ شن جه سينه

كوچه لرده آخان قانلارا

شراب دير دئييب

آذربايجان ساغليغينا

باشا چكدينيز سرخوشلار ...

اوتانماز قارغالار ...

قولچاقلار ...

گلين كؤچوردونوز

مارش هاواسيندا ، دونن ،

يانيق كرمي ايله دانس ائتدينيز

او هاي كويلو گئجه نين

بور بوجاغيندا

ساتقين دئيه آدلانديردينيز

كؤمور كؤمور آليشانلاري !...

اوتانمازلار ...

قولچاقلار ...

دولاشيق دوشسه يدي ده

يوللار بير زامان

يانسايديق دا آليشان لارا

قورخونو بئجرسه يديك

رؤيالاريميزدا

بوراخ بوتون كئچميشين

كيرلي آنلارين ...

بير ايستكان چاي سوز

ايچيب ده

گئتمه لي يم

اوزاق يئرلره ....

بابك قوجا اوغلو

(تقديم به روح پرفتوح حضرت امام خميني كه بزرگترين انقلاب عصر بدست او اتفاق افتاد )

گؤزلريني

اووجونا سيخ

ياد گؤزونه ساتاشماسين

يايليغيني

چك اوزونه

ياناقلارين شئه چكيب دير

اللريني

اوشاق كيمي

داليندا گيزلت

بيردن توتان اولار

اليندن آمان ...

اوره يين يورولماسين موطلق

دؤز ...

لاپ بو داغلارين داليندان

لاپ دنيزلرين اورتاسيندان

لاپ بئله شهريمين

چيراقلي گئجه لريندن

قورتولوب

سنه ساري

قاچاجاغام ...

(بابك قوجا اوغلو )

بير ايستكان ايستي

دادلي چاي قدر ،

دورمك قدر ،

يئمك قدر ،

بوز قدر ،

قاشيقلاردا يئرلشن او

آش قدر

سني سئومه ييمي

آنارسان مي سن ؟

دوداغيندا

هئي سوزولن بال قدر

گؤزلرينده بير گئجه ليك

آي قدر

اينجه اينجه بارماق قدر

ايز قدر

سني سئومه ييمي

آنارسان مي سن ؟

ماهني لاردا دوشوندويوم

سؤز قدر

نغمه قدر

شعير قدر

ساز قدر

تئز اؤتوشن

پاييز قدر ، گوز قدر

سني سئومه ييمي

آنارسان مي سن ؟

خاطيره ميز ياشاياجاق

فصيللر

گون گئده جك

اؤتوشه جك بو ايل لر .

تاپداناجاق عؤمرو بويو ساحيللر

او ساحيل ده

بير داش قدر

دوز قدر

سني سئومه ييمي

آنارسان مي سن ؟

قلم قدر ،

كاغيذ قدر ،

ناز قدر !

آليشديغيم سن سؤيله ين

سؤز قدر

كيتاب قدر

بو يازديغيم

سؤز قدر

سني سئومه ييمي

آنارسان مي سن ؟ ....

(بابك قوجا اوغلو )

بو گئجه

بير شعريم باغيرير سنه ،

سوسما گل ...

آياقلارينا دؤشنديييم

چيچكلرين خطرينه ،

گل ...

مزارلارين قاپالانميش

تابوتلارينا بنزت اوره ييمي

و سانسور اولموش

اؤلولرين ديلي كيمي لال

بير هيتلر هئيكلينه

بنزر دوروشوم .

سانجيلميش يوللارا

بوم بوز باخيشلاريم ،

گل ...

اينسان ائولادي !

بير آزدان قورولاجاق

دار آغاجلاري

گلمه سن

آسا بيلجكلر مني

ساده جه ...

اوتراجاغين آياغيم آلتدان

بوشا گئتمه يي قدر

و بلكه ده

قاه قاه گولجكلر

بير جنازه اؤنونده

كيشي لر ...

توپورنده اولاجاق

اوزومه اوندا !!!

گل ...

بير آزدان

تئلئفونلار ايشدن دوشه جك

سيملر دولاشاجاق آياقلاريما

آرخانجا قاچا بيلمه يه جه يم

قارالداجاقلار مني ...

گونش باتاجاق

دورمادان بير آن

شاه گؤلوده

گولوستان باغيندا

بلكه ده لاپ

بيزيم حيطين كرديسينده

آه ...

سئوگيليم !

گئجه لر مني بوغمادان

يوللار بؤيله اوزانمادان

قيزلار ساچيني يولمادان

آلدانمادان

يارالانمادان

دايانمادان

گل ...

يانيما بو گون .

(بابك قوجا اوغلو)