( با ياد دلاور مرداني كه چه در صحنه دفاع و چه در صحنه سازندگي با جان و دل كوشیدند ... )

قوي ائشيتسين بو دونيايا گلن لر

پاي وئريريك بو تورپاغي سيزلره

بيز قوجاليب اؤلوب گئتسك يقين كي

سيزلر آرخا دورماليسيز بيزلره

بو توپراقدا آلما بيتر ، نار بيتر

دسته دسته قيزيل گوللر ياشايار

بو توپراغا قوللوق ائتسز اورك دن

اوزون ايللر توپراق شن جه ياشايار

ناموسون دور ، شرفين دير بو توپراق

ويجدان سيز دير اؤز يوردونو ترك ائدن

اؤز يوردونو قورو ، ياشات ايلقاري

آيدينليغا چاتار ظلمت دن گئدن

وطن پارا دئييل ، وطن پول دئييل

بو داغلارين هر كسسه يي وطن دير

وطن اويون دئييل ، وطن سؤز دئييل

وطن كي سن دئييل ، وطن نه من دير

وطن كلمه دئييل پوزا هر گلن

هر كيشي نين قابار الي وطن دير

وطن شهرت دئييل ، وطن سوي دئييل

بو سؤزلري اؤزو بيلن وطن دير

گؤزل بير سؤز دئميش آتا باباميز

يولچو مطلق يول اوستونده گرك دير

آغلاماقلا ، هايلاماقلا اينان كي

اؤز يوردونو ياشاتماق بير ديلك دير

وطن دردي سنين دردين اولوب سا

كولونگونو گؤتور آختار توفنگي

آبادلا هر قاريش باغي باغچاني

خور باخانين گؤزونه تاخ فيشنگي

ياشاياجاق ، اوندا يقين گوله جك

سنين الين ياشاداجاق وطني

سيزدن سونرا نسيللرده گلجك

ائده جكلر قبله داشي چمني ...

قوي ائشيتسين بو سؤزلري كؤرپه لر

وطنداش دير سوي آدينيز بو گوندن

سيزي تبريك ائدير بوتون قونچالار

سئوينه جك هامي بو خوش دويون دن !...

( بابك قوجا اوغلو )

 يازميشام سئوگيمي گونشه ، آيا

چكديييم آغريلار ، توتوشماز سايا

آنجاق كي راضييام سن وئرن پايا

ياشاتماق ايسترم هر آن سئودامي

اللرينده ايتيرميشم دونيامي ...

صاباحيمي دونه نيمده ايتيرديم

عؤمرو گوندن گونه باشا يئتيرديم

گنجليييمي اللرينده ايتيرديم

ياشاتماق ايسترم هر آن سئودامي

اللرينده ايتيرميشم دونيامي ...

سنسيز منه بو دونيا بير قفس دير

سنله اولماق ان شيرين بير هوس دير

آيريليغا فيكير ائتمك ابس دير

ياشاتماق ايسترم هر آن سئودامي

اللرينده ايتيرميشم دونيامي ...

(شعر : بابک قوجا اوغلو )

مني او يوللارين سونونا

مني ساپ ساري يارپاقلارين

سون آنلارينا

مني سندن آييران

ثانيه لرين

دؤيونتوسونه ياز ...

آديمي اؤيرنمك

چوخ چتين دئييل

اوره ييم ال چاتماز

بير قالا دير ... يوخ

سنين كيمي ياخينام

اؤزونه هر آن

لاپ ائله

دووار بير قونشونوز منم

هئي ...

ايكيميزده داريخاريق هر گئجه

سن اوتاغيندا

منسه ...

تبريزين دولان با دولان كوچه لرينده

ايكيميزده آغلاريق

سن ياستيغيني قوجاقلايار كن

منسه ...

بوتون خياوانلاري

ايچيمه اودوب ... نسه ...

گؤزلرين دوم دولو

شعرلريم كيمي

مني اولدوزلارا

مني ياغيشلي اؤتوشن بولودلارا

مني تام سينيق كؤرپولرين

آخارينا ياز ...

مني تام نيسگيل داشييان

آزادليق آختاران

يئتيم – يئتيم دوغولان

كؤرپه لرين

آلين يازيلارينا ياز ؛

مني ...

مني ...

مني ياز !!!...

(شعر : بابک قوجا اوغلو)