بو شعری منیم سسیمله دینله یین (Download Now)

بير آز سويوق ايدي بير آ‍ز دومانلي

دنيزين هاواسي اوشوتدو مني

آختارديم ساحيلده آياق ايزيني

تاپماديم ، آيريليق اوشوتدو مني

آرتيق چوخ گئج ايدي گون ده باتيردي

قاييق لار ساحيلده قوما باتيردي

تك ايديم ، كؤنلومده بير قيز ياتيردي

سنسيزليك خيالي اوشوتدو مني

آه ! ايندي هارداسان ، هارداسان گولوم ؟

آغزيمدا اود اولوب آليشير ديليم

چتين دير آيريليق ،‌آسان دير اؤلوم

سندن بوش قوجاغيم اوشوتدو مني

دنيزين سسينه هاي وئرديم او آن

اؤزومو سولارا پای وئرديم او آن

جان وئرديم ، پای وئرديم ، هاي وئرديم او آن

دنيزين سولاري اوشوتدو مني

دوستاغا دؤنوبدور ايللريم ـ آييم

آغزيمدا بوغولوب هاراييم ـ هاييم

منيم كي دونيادا بو ووصال پاييم

او تايدان آرازا حسرتله باخير

سسيمه سس وئرسين قوي ساوالان دا

سؤزومه دوز دئيير ايندي يالان دا

وطن ده وطنه حسرت قالاندا

او تايدان آرازا حسرتله باخير

نه الده سيلاحيم ، نه ديلده آهيم

ائويمده اؤزوم چون يوخدور پناهيم

اوزاق دوشنلري گؤرور آللاهيم ،

او تايدان آرازا حسرتله باخير ؟

بو حسرت داشيني بير گون آتيم دا

قوجاغينا چؤكوم ، بير آز‍ ياتيم دا

ائله بو مصرعي بوردا ساتيم دا

"او تايدان آرازا حسرت له باخير "

 اوزاق گزمه يانيما گل سئوگيليم 

 دوداغيندا ايتيرميشم سؤزومو 

 گولوشونله جانيمي آل سئوگيليم

 سن او تايدا من بو تايدا آرالي

 کؤنلوم درد ايلندن اولوب يارالي 

 يانيما گل آذربايجان مارالي

گولوشونله جانيمي آل سئوگيليم

 گولوشونله جانيمي آل سئوگيليم

یئنه او دووزده گؤروشه یدیک

یئنه ده منیم چون سن

دسته ـ دسته قیزیل گوللری وئریدین

من باخیب گؤزونه وورولایدیم

و سن جومایدین

قوجاغیمدا کی تکلییین

ان دیرلییینه ...

یئنه او دوزده گؤروشه یدیک

بیر دوداق "سئویرم" ماهنی سیلا بئله

و سنین گؤزلریندن چاغلایان

آرازلارلا بئله

یاشایایدیق آن به آن

عؤمروموزون

یاز چاغلارینی .

یئنه ده ...

یئنه ده ...

او دوزده

کؤنلومو سانجاقلالایدیم

سنین الینه

بیر گون گئتسه یدین دئیه

ائله او دوزلرده اؤلیدیم

سن منه تکی جان یوخ

سئوگی یوخ

بوداق ـ بوداق

عؤمرومده یاشایان

وارلیغیمسان .

یئنه او دوزده گؤروشه یدیک

یئل اسه یدی

و تئللریندن دوزه یاییلایدی

پرده ـ پرده هاوالاریمیز

کؤنلومون چیرپیندیسیلا

اؤزومو سنده ایتیرمکله

بیر دلی کیمی هارایلاریملا

گؤروشه یدیک کئشکه

آددیم ـ آددیم گزدیییمیز او دوزلرده یئنه ...

سئللر کیمی زیروه لردن ائنیبدیر

او داغلارین مارالی دیر سئوگیلیم

یئللر کیمی اوره ییمده اسیبدیر

مندن چوخدان آرالی دیر سئوگیلیم

دانیشاندا باخ او قیزین دیلینه

دونیامی غرق ائدیب ، بوغار اؤزونده

من جنتی گؤردوم اونون گؤزونده

او داغلارین مارالی دیر سئوگیلیم

ساوالاندا آت چاپدیران نیگاردی

شیمشک کیمی آزمانلاردا چاخاردی

اوردا دوروب بیر تبریزه باخاردی

او داغلارین مارالی دیر سئوگیلیم

سازیمدا دیلنه نر یانیق کرمی

اصلی نین هجرانی یاخار کرمی

او اصلی می منسه گؤرن کرم می ؟
او داغلارین مارالی دیر سئوگیلیم

اللرینده ایتیرمیشم دونیامی

آختارمیشام من تاپمیشام سئودامی

دئیین گلسین ، داغلاماسین یارامی

او داغلارین مارالی دیر سئوگیلیم

بیر مکتوبدور ، سئوه – سئوه یازمیشام

او گؤزلری گؤرن گوندن آزمیشام

عؤمورلوک عؤمرومه اونو یازمیشام

او داغلارین مارالی دیر سئوگیلیم

بو سئوگی یه سیز دئمه یین هوس دیر

اونسوز دونیا واللاه منه قفس دیر

او سینمده حیات وئرن نفس دیر

او داغلارین مارالی دیر سئوگیلیم

سؤز سؤیله دی قصد ائله دی کؤنلومه

بابک ! دئییب نغمه سالدی دیلیمه

تانری تحفه وئریب اونو ائلیمه

او داغلارین مارالی دیر سئوگیلیم

گزمه یه غریب اؤلکه ، اؤلمه یه وطن یاخشی ...

یئنه اؤز ائویمه قاییتدیم . یئنه ده او کئچمیش گونلرین گؤزل خیاللارینی بورادا خاطیرلادیم . یئنه او باغچادا کی گوللرین قوخوسو منی مست ائتدی . سطیر سطیر یازدیغیم عؤمور گونلریمی بیرداها اوخودوم . آه ..... نه گؤزلسن وطن ! بو ائوی بیر نئچه زامان فرانک یولداشیمیز سیلیب ، سو÷وروب ، دئمک اؤز گؤز ببکلری کیمی قورویوب ساخلامیشدی . آنجاق بورانی سیل سوپور ائله مک منیم اؤز الیم له باشقا عالمی وار . اونون چون من بیر داها قاییتدیم . بیر داها سیزین چون یازیب و دیکلمه ائده جه یم . سیزده اؤز باخیشلارینیزلا ، محبتلی ـ ایستی سؤز صحبتلرینیزله منی بو یولدا یاردیم ائدین . آنجاق قوی سون سؤزومو ائله سئوگی دونیاسیندان هارایلاییم . قوی او ائشیتسن بو هارایی :

یالنیز سنی سئویرم ...