سؤیله دی : اولمایا آزجا سئویرسن

اوره ییم توتولوب تتیره دی بیر دن !

سن بيزي فرمانلا يوخ، انصافلا ديندير سئوگيليم

واخت سیز مزارینی قازما آماندی. 

کاشکی ،بو دونیادا نه زور، نه تاماح

نده قلبی کینلی انسان اولایدی.

نه بیری- بیرنده ن کوسوب گئدئیدی

نه بیرینین کؤنلو پئشمان اولایدی.

نه دوستا خیانت ، نه یارا حسرت

نه غیبت اولایدی، نه دالدا صحبت

نه قلبیده قالایدی گیزلی محبت

نه انسان اوره یی پنهان اولایدی.

سیرری وارسا چوخ درینده دونیانین

یازیلایدی دفترینده دونیانین

دئیرم کی ، هر یئرینده دونیانین

زحمت - شرف ، حیات - داستان اولایدی.

بهمن وطن اوغلو

 (۱)

گوللره نه دئیه رم

عؤمرومه راحاتلیق سئچسم

یوللارا نه دئیه رم

آرزو چوخ ، عؤمور قیسسا

حسرت قالدیق او یازا

گؤز یاشلاریم آخارسا

سئللره نه دئیه رم

آرزوموز گول آچماسا

گوللر کؤنول آچماسا

کؤنوللر دیل آچماسا

ایللره نه دئیه رم

بیر سؤز کئچدی اورکدن

کئچمرم بو دیلکدن

ساز چیخماسا کؤینکدن

تئللره نه دئیه رم

حسرتی یاندیرماسام

یولونو دؤندرمه سم

سوکوتو دیندیرمه سم

گوللره نه دئیه رم

بیز نه کسک ، نه داشیق

یانماق اوچون یارانمیشیق

ائو ـ ائو وئرمه سک ایشیق

ائللره نه دئیه رم

ووصال گوماندا قالسا

یوللار طوفاندا قالسا

تبریز دوماندا قالسا

ائللره نه دئیه رم

(۲)

سن آنامین قوجاغیسان

اوره ییمین بوجاغیسان

مدنیت اوجاغیسان

آنا یوردوم آذربایجان

کئشییینده ائلیم دورموش

بابک بابام دیوان قورموش

دوشمانینا ضربه وورموش

آنا یوردوم آذربایجان

اوزان لاردان یادگارسان

باهار باغلی بیر دییارسان

کیم دئیه ر کی سن سولارسان

آنا یوردوم آذربایجان

داغلارینین باشی قاردیر

باغلار دولو میوه باردیر

هر یاندا حؤرمه تین واردیر

آنا یوردوم آذربایجان

تاریخ بویو آدین ـ سانین

تؤکولسه ده ناحاق قانین

توکنمز دیر شرف ـ شانین

آنا یوردوم آذربایجان

یایلاقلارین صفالی دیر

گؤزل لرین حیالی دیر

سئونلرین وفالی دیر

آنا یوردوم آذربایجان

سنه بابک گوونمیشدی

آتین دان یئره انمیشدی

تورپاغینا دؤشه نمیشدی

آنا یوردوم آذربایجان

آدین بزک بیزیم ائله

گونش لی گونلرین گله

یئر اوزونه نور سپه له

آنا یوردوم آذربایجان

باکی ، تبریز ، گنجه ، اهر

آیریلاندا ایچدی زهر

بیرلشه جک بیر گون سحر

آنا یوردوم آذربایجان

دان یئرینده اولدوز گلیر

وطن بایراغی یوکسه لیر

دوشمانلارین باغرین دلیر

آنا یوردوم آذربایجان

جانلار سنه قوربان اولا

چیچک لرین قویما سولا

اوره ییمیز غمله دولا

آنا یوردوم آذربایجان

«ممدلی» یم سن منیمسن

«آنام دوغما وطنیمسن »

صاباحیم سان ، دونه نیمسن

آنا یوردوم آذربایجان

(شعر : اسماعیل محمد ثانی ـ ممدلی )

خیالا دالمیشدی قصرینده بیر شاه

کؤنلونه ال تاپدی بیر قفس قوشو

دئدی : سلطانیمین سارای لاریندا

گؤزل دیر یوردومون تورپاغی ـ داشی

شاهنشاه امر ائتدی ، آچیلدی قفس

قوش آزاد اولاراق اوچدو گؤیلره

دولاندی داغلاری ، گزدی چؤللری

آخیر قوندو قورو ـ یانغین بیر یئره

بیر سولغون بوداقدا یووا باغلادی

اوردا آرام توتدو هفته لر ، آیلار

شاه حئیرتده قالیب سوردو وزیردن :

او یووا اوستوندور ، بیزیم سارای دان ؟!

شاهین بو سووالین سحر یئل لری

قوشون قولاغینا چاتدیردی بیردن

قوش دئدی : ای سلطان ! من بو یووانی

قیمتلی سانیرام سیزین سارای دان !

( شعر : انصار قاراداغلی )

او گؤزل تک بیر اؤپوش له منی مهمان ائله سه

نه اولار ؟ خسته نین دردینه درمان ائله سه

بیر ده کی بال دوداغیندان زکاتی بابتینه

مستحق بیلسه منی یوخسولا احسان ائله سه

قارا گؤز ، ناز باخیشیندا اوخودوم سئوگی سؤزون

نه گؤزل دیر ، گؤزونون عهدینه پیمان ائله سه

اونودوب عاشیقینی ، آتسا منی نئیله  یه رم ؟
رقیبه ماییل اولوب ، کؤنلومو ویران ائله سه

تورونا سالدی منی اینجه دوداغیندا کی خال

راضییام اوخلایاراق سینه می ، شان ـ شان ائله سه

به نزه ییر گوللو چیچک لی یازا یارین جمالی

داراییب تئللرینی اوزدن اونو یان ائله سه

حاظیرام امر ائله یه «مکه» ده بیرگه دولاناق

«منا» داغیندا کسیب باشیمی قوربان ائله سه

باسارام باغریما ، جان تک من اونون گول بدنین

قاشی نین خنجری لاپ قانیمه غلطان ائله سه

یاتارام حشره کیمی ایسته مه رم کی اویانام

او قارا ساچلارینی اوستومه یورقان ائله سه

آتارام جنتی ده ، دونیانی دا ، بیر دفعه لیک

اؤز یاریم ، سئوگی باغیندا منی باغبان ائله سه

بوی ـ بوخون قاش گؤزونه خلق تماشایه دورار

سئوگیلیم گونده گلیب شهرده جولان ائله سه

یارینین آی اوزونو قلبینه « ممدلی » یازار

او ، گؤزل ، تک بیر اؤپوش له منی مهمان ائله سه

(شهر : اسماعیل محمد ثانی ـ ممدلی )

جانان دی،بیرده من،گئجه اون بیرتمام ایدی ،

گیزلی دئییب دانیشماغا اصلی مقام ایدی .

سوزگون باخیشلا کونلوم ائوین غارت ائیله دی،

ماهردی فنئ - سئحرده ، ظن ائتمه خام ایدی.

شوقئ - لبئ - نیگار ایله بی هوش -مست ایدیم ،

بیرده شرابه مئیل ائله سه یدیم ، حرام ایدی .

عشق ایله صبح وشامیمی سر خوش کئچیرمیشم ،

صبحوم ده اوندا صبح ایدی ، شامیم اوشام ایدی !

هیجران گونونده ناله می بیر کیمسه بیلمه دی ،

یارین بو تحفه سی منه بیر احترام ایدی .

هر بیر سئواله یار جوابیمدا منتظر ،

حئیران اولوردوم ائیله کی ، شیرین کلام ایدی.

اول منیمله یار ایدی سونرا رقیب ایله ،

واحید ، دوشونمه دیم ، بو نه حق وسلام ایدی ؟!

علی آقا واحید