بو شعری منیم سسیمله دینله یین ( این شعر را با صدای من بشنوید )

باخیشیندا مین حکمت وار مین معنا

گولوشونده اورک سؤزون دیلله نیر.

او گولومسر دوداغینلا آی آنا

آرزولارین چیچک لری گولله نیر

گولوشونده اورک سؤزون دیلله نیر

سیلینمه سین دوداغیندان گولوش لر

سن گولنده اورک گولور ، گؤز گولور

گولوشونله اوره ییمده نه قدر

آرزو گولور ، دیلک گولور ، سؤز گولور

سن گولنده اورک گولور ، گؤز گولور

آیریلیغین اود قالاییر سینه ده

آلوولانیر گؤروشونه اوره ییم

آرزولاریم گول آچماسا ، یئنه ده ـ

ووصال عشقی  گره ییمدیر ، گره ییم ؛

آلوولانیر گؤروشونه اوره ییم .

ایسته رم کی هجران یئلی اسمه سین ؛

چیچک دولو آرزوموزون باغینا

بو آیریلیق قرارینی کسمه سین ،

اومید باغلا شن ووصالین چاغینا ؛

چیچک دولو آرزوموزون باغینا

غم یئمه کی بیزیمکی دیر گلجک

بیر دوداق گول بلکه هیجران اوسانا

دوداقلارین قوی آچیلسین چیچک تک

گلجه یین دان یئری تک آی آنا !

بیر دوداق گول بلکه هیجران اوسانا .

«قارا گونون عؤمرو آزدیر» ـ دئیرلر ؛

صاباح ووصال غنچه آچار ، گول سایاق .

اولا بیلمز حیات بویو بو تهر

سن اوغولسوز ، من آناسیز یاشایاق؛

صاباح ووصال غنچه آچار گول سایاق .

ائلدار موغانلی

بو شعری منیم سسیمله دینله یین ( این شعر را با صدای من بشنوید )

منیم کؤنلوم ائله وورغون یارانیب

بو قارلی داغلاردان آیری یاشاماز

باشی بالدیرقانلی ، یانی یارپیزلی

سویوق بئلاقلاردان آیری یاشاماز .

دولایی جیغیردان ، یول آشان داغدان

ماراللی مئشه دن ، کهلیک لی داشدان

شئهلی بیچه نکدن ، چیچکلی دؤشدن

گؤزل اویلاقلاردان آیری یاشاماز

داغلار گؤزه لینین قیوریم تئلیندن

اینجه لهجه سیندن ، شیرین دیلیندن

چوبان توته ییندن ، صبا یئلیندن

سرین یایلاقلاردان آیری یاشاماز

حقیقت وارلیغدان ، ووصال دیلکدن

عاغیل ، کامال باشدان قوت بیلکدن

محبت گؤزلردن ، آرزو اورکدن

شعیر دوداقلاردان آیری یاشاماز

بالاجا اوغلونام ای بؤیوک وطن

ائشیت بو آوازی ، بیر قولاق آس سن

سنین بؤیوتدوگون بو کؤرپه «بهمن»

صفالی چاغلاردان آیری یاشاماز .

بو شعری منیم سسمله دینله یین ( این شعر را با صدای من بشنوید )

بلکه ده دیل تاپدیق سؤز تاماهیندا

نه ییم وار ، بیر ایکی سؤزدن ساوایی

اوجاق وار ، بیر ایشیم کؤز طاماهیندا

منیم اوره ییمده کؤزدن ساوایی ...

منیم ایسته ییمین الی سرینده

سنین عنادینین کؤکو درینده

سؤیله نه گؤیرر وعده لرینده

«گؤزله» دن ساوایی « دؤز » دن ساوایی ؟

خیالین یوللارا یول آسان اولا ،

منیم بو آرزوما یول آسان اولا ،

سن آددا نیشاندا یول آزان اولا ،

بیر عنوان بیلمه یه بیزدن ساوایی ...

( ممد آراز )

الینده وئردیییم گول

سولوب ، گئدندی

دوداقدا بال گولوش

کسیب ، اؤتندی

بو دونیا فیرلانیب

باتیب ، ایتندی

منی سئودییینی ،

اونوتما گولوم !

تئز اؤتن چاغلاردا

قالدی هوسیم

هایقیردیم ، باغیردیم

دوندو نفسیم

آنجاق اوزاقلاردان

ائشیتسن سسیم ،

منی سئودییینی ،

اونوتما گولوم !

من سنه سئوگی یوخ ،

وطن دئمیشم .

من سنی دونیالار

بویو سئومیشم

من سنی سئومکده

جاندان کئچمیشم

منی سئودییینی

اونوتما گولوم !

یئل گلیب قوپارسا

گولو الیندن

ساچلارین اویناسا

اسن یئل ایله

مین ایل ده گلیب ـ گئدسه

اؤتسه بو گوندن

منی سئودییینی ،

اونوتما گولوم !

(بابک قوجا اوغلو )

بو شعری منیم سسیمله دینله یین ( این شعر را با صدای من بشنوید )

بو گئجه یاتماغا تله سیرم من

سئوگیلیم یوخوما قوناق گلجک !

اوتوروب اؤنومده او ظالیم قیزی

گؤزل بیر سحردن ناغیل دئیه جک

بو گئجه منیم یوخولاریمدا

داغلارین باشیندا تونقال یاناجاق

بو گئجه تبریزین بور ـ بوجاغیندا

بوتون سئوگی لیلر قوناق اولاجاق

بو گئجه یاتماغا تله سیرم من

یوخومو سنین چون ناخیشلامیشام

ایسته رسه سحر اولسون ، دورمایاجاغام !

بو گئجه یوخومو سنه وئرمیشم

چوخداندیر سنینله گؤروشمه میشم

بو گئجه یوخومدا گؤروشومه گل

بو اورک ائویم قوی سنین اولسون

اوتوروب ایچینده بیر آزچا دینجل

بو گئجه سنین دیر ، بو یوخوم سنین

بو گئجه عؤمرومون ان خوش چاغی دیر

بو گئجه سن ایله اولدوغوم یوخو

بوتون یوخولاریمین پادشاهی دیر ...

گؤزلیم !

   سئومه یه جک ایدین سه

        ندنسه گؤزلریمه توخونماق ایسته دین ؟!

                              بلکه ده سن دئییلمیش سن

                                                        بلکه ده من

                                              کابوس لار ایچینده

                                                      سئومیشم سنی .

بیر غریب آخشامین

             غریب یولچوسو

                   بیر دلی شهرین ، دلی بالاسی

                                                     آه ...

                                                       سنی سئویرم .

باخمازسان اوزومه

                 گئدیرم اینان

                     لاپ بو یوللاردا

                                 منی ساخلاماز

                                      لاپ بو شهرده آنلاماز منی

                                                                      آه ...

                                لاپ دلی جه سینه

                                                                              اونوتسان منی

                                                                                     سئویرم ، گؤزلیم ، سئویرم سنی .

گئجه ...

            تبریز ...

                          من ...

                                    و ...

                                            ندن سئومه یه جکسن منی ؟

گئدیرم ...

             گئدیرم ...

                          « گؤروشه قدر » ! .

بو شعری منیم سسیمله دینله یین ( این شعر را با صدای من گوش کنید )

کوسوب گئدسن ، گلجکسن

گؤزومه گؤز تیکه جکسن

بیر گون منی سئوه جکسن

من دونیادا اولمایاندا

" گئتمه ! " دئسم ، دایانما گئت

یالوارسامدا ، اینانما گئت

داریخساندا ، آغلاما گئت

من دونیادا اولمایاندا

طالعیم باغلانیب قارا گؤزلره

او قیز اوزومه باخمیر هاچاندیر

جانیم دا قورباندیر

شیرین سؤزلره

قولاغیم سسینی

دویمور هاچاندیر ...

او گؤزلر بوغاجاق

منی اؤزونده

ساچلارین سئوگی دن

آساجاق منی

تامارزی قالمیشام

او دوداقلارا

هاچان دئیه جک

سئویرم سنی ؟!...

گل دئسه ن ، گلرم

بو یوللار بویو

سایماسان آغلارام

فصیللر بویو

قورویوب ، دایاننام

مین ایللر بویو

سنین گول اوزونو

من گؤرمک اوچون

سئویرم باغیردیم

سن اینانمادین

او قدر یالواردیم

منی سانمادین

بلکه بو سئوگیمی

سن دویانمادین

گؤزلرین گؤزومدن

کوسوب هاچاندیر ...

من سنی سئویرم

لاپ رمانتیک جه سینه

من سنی سئویرم

لاپ بو داغلار قدر

من سنی سئویرم ...

تبریزم کیمی !

سئویرم عزیزیم ،

سئویرم سنی .

یئنه ده گئجه ...

ساعات اون ایکی

باشیمی قویورام شعرلریم اوسته

دالیرام گؤزونون ماوی لییینه

من سنی سئویرم

سئوگیلیم اینان

لاپ بو پولیس لر

قووسالار منی

لاپ دا آسسالار

دار آغاجیندان

لاپ دا دیلیمی

کسسه آغالار ...

سئویرم ، سئویرم ، سئویرم سنی !...

من سنی سئویرم

لاپ رمانتیک جه سینه

یالنیز ئورنالار کیمی

سئویرم سنی

بو آخشام

گؤزونده یاش اولاجاغام

حسرتله آغلاییب ، قورتولاجاغام

بو آخشام ساچینا

باغلاناجاغام

بو آخشام گؤزونده

بیو اولدوز کیمی

قارانلیق گؤیلرده

پارلایاجاغام

من سنی سئویرم

لاپ رمانتیک جه سینه ...

یوخوما گلمیشدین دونن سئوگیلیم

اوتوروب ، دانیشدیق سئوگی دن خیلی

اؤنومده دورموشدون بیر هئیکل کیمی

گولوردون ، گولوشون آلداتدی منی

من سنه وورولدوم ، سنه بو گئجه

سنی من دوشوندوم نه ائدیم بئله

من سنی سئویرم اینان ساده جه

اوره ییم تیتره ییب ، دؤیونور سنی

من سنه وورولدوم لاپ بؤیله سینه

من سنی ایناندیم تبریزیم کیمی

سن منیم گؤزومده بیر مانکن اولدون

من سنی دینله ین رسامام ایندی

او آخشام ساچینا وورولدوغوم چاغ

بیر گؤزل تابلودور اورک ائویمده

سن منه گولرسن هر گؤروشوموزده

من سنله دولارام دونن دن آرتیق

سن سس سیز ـ سمیر سیز بیر قایا کیمی

منیمسه اوره ییم سئوگیدن پاتلار

بلکه ده بو گئجه گلم گؤروشه

« سئویرم » باغیرام سنه سئوگیلیم

بلکه ده بو گئجه الیندن توتوب

دانیشام ایللرین آیریلیغیندان

بلکه ده بو آخشام ، بو گئجه سنین

تویونو بؤیله جه کؤنلومده توتام

بلکه ده شهرین هر کوچه سینده

خیاوان آرابالاری

شنلیک ائده رک سیقناللایالار

بلکه ده بو گئجه بوتون پارک لار

سنین تویونا ییغینجاق اولا

بلکه ده ، بلکه ده ، بلکه ده تبریز

سنی اوره ییمه بؤیله پای اوما

من سنی سئویرم ، سئوگیلیم اینان

بلکه ده رویالار بورویه منی

بلکه ده ...

بلکه ده بو گئجه خیاللاریمدا ،

سنین اللریندن من توتان اولام !...